opens in Harpa spring 2026
Heimur íslenskrar tónlistar er ný upplifunarsýning fyrir alla aldurshópa, staðsett við aðalinngang Hörpu þar sem íslenska tónlistarhjartað slær.
Gestir eru leiddir í gegnum heim íslenskrar tónlistar frá landnámi til dagsins í dag með einstakri hljóðleiðsögn úr smiðju okkar fremsta listafólks.
Sýningin kannar hvernig náttúruöflin, sögulegir atburðir og samfélagslegar aðstæður hafa mótað íslenska tónlistarmenningu í tímans rás og hvernig slík öfl gætu hafa haft áhrif á listafólk samtímans eins og Björk, Laufey, Sigur Rós, Kaleo, Bubba Morthens, Víking Heiðar Ólafsson og Kristján Jóhannsson.
Verið velkomin í ferðalag um stórbrotið menningar- og tónlistarlíf þjóðarinnar í Hörpu.
Axel Hallkell Jóhannesson, einnig þekktur sem Langi Seli, er hönnuður sýningarinnar og einn reynslumesti sýningar- og leikmyndahönnuður landsins. Hann hlaut meðal annars Grímuna fyrir leikmynd ársins 2025 í sýningunni Fjallabak og hannaði sýninguna Eldheimar í Vestmannaeyjum sem hlaut Hönnunarverðlaun Íslands árið 2015.
Axel er frumkvöðull sýningarinnar ásamt athafnamanninum Þorsteini Jóhannessyni. Sameiginleg hugsjón þeirra beggja var að skapa lifandi og aðgengilegan vettvang fyrir miðlun íslenskrar tónlistararfleifðar og fengu til liðs við sig hóp af listafólki sem deilir þeirri hugsjón.
Feðgarnir Þórarinn Eldjárn, rithöfundur og þjóðargersemi, og Úlfur Eldjárn tónskáld eiga heiðurinn af hljóðleiðsögninni sem fléttar saman grípandi atburðarás, frumsamda tónlist og hljóðheim ásamt tóndæmum úr íslenskri tónlistarsögu.
Að heimildaöflun og fræðilegu innihaldi komu Arnar Eggert Thoroddsen, Árni Heimir Ingólfsson og Þorbjörg Daphne Hall.
Heimur íslenskrar tónlistar þróaðist út frá samstarfi Axels Hallkels og Þorsteins við Bjarka Sveinbjörnsson og Jón Hrólf Sigurjónsson árið 2016. Bjarki og Jón Hrólfur byggðu upp Tónlistarsafn Íslands í Kópavogi og áttu þann draum að finna starfsemi safnsins nýtt heimili í Hörpu en árið 2017 fékk það safn og starfsemi þess svo inni hjá Landsbókasafni Íslands.